Cumenzà ha tut cun in telefon tranter Jennifer Ribeiro Rudin ed Andi Schnoz. Ils dus musicists han creà ensemel cun Paolo Donnicola ed Immanuel Giger in chalender d’advent digital.
Segn da vita da la scena culturala
Sin kulturadvent.ch chattan ins dal 1. fin ils 24 da december mintga di ina nova contribuziun creativa. Videos da musica, prelecziuns u istorgias dad artistas ed artists da Cuira. Cun il chalender vul la scena culturala da Cuira dar in segn da vita e mussar ch’ella è anc adina activa.
Il project è voluntari ed i dat in'opziun da collecta. Cun ils daners ramassads vegnia la pagina finanziada e – sch'i resta anc insatge – las artistas ed ils artists, ha Andi Schnoz declerà.
Avantatgs – ma er privels
L’avantatg en congual cun transmissiuns da concerts è tenor Andi Schnoz, ch'il chalender è independent dal temp. Tut las fanestrinas avertas pon ins ir a guardar suenter. Intschertezzas menziuna il musicist da Cuira a reguard il futur. Las furmas digitalas possian bain esser ina nova pussaivladad, ma i possia esser che la glieud sa disia vid questa situaziun confortabla e stoppia vegnir motivada per puspè ir a concerts analogs.