Eligi Derungs, oriund da Vella, ha lavurà durant 16 onns sco redactur da televisiun tar RTR: passa 12 onns per il Telesguard, ils davos onns per l’emissiun da Cuntrasts. Durant quel temp ha el realisà numerus films documentars – per il solit films cun in flair per in mintgadi svanaivel en las vals grischunas.
In flair per il mund passager
Uschia ha Eligi Derungs tranter auter documentà ils paucs abitants da Mulegns («Mulegns - cò nign tgi ferma») ed el ha accumpagnà durant in onn il ir e vegnir a Vanescha entadim la Val Lumnezia («Vanescha - pli gitg ch'ins stat e pli gitg ch'ins stess»). Però dasperas stevan ad el a cor era films naschids or da l’actualitad, uschia ha el p.ex. realisà la fin dal 2015 dus films documentars davart il center per requirents d’asil Rustico a Laax («Ils novs vischins da Laax»). Ils films dad Eligi Derungs han adina demussà la grond’empatia ch’el aveva per ses protagonists e sias protagonistas.
Engaschament per il teater laic
Gia da pitschen si ha Eligi Derungs gì ina gronda passiun era per il teater. En la vegliadetgna da 7 onns è el stà l’emprima giada sin tribuna. Silsuenter è el stà sin divers palcs dal teater laic en numerusas funcziuns: sco actur, autur, reschissur e suprastant en l’Uniun per il teater popular Grischun ed en l’uniun correspundenta svizra.
Durant diesch onns ha Eligi Derungs era furmà ensemen cun Linus Livers il duo cabaretistic «Paun cun pèra». Dal 1997 è el vegnì undrà per ses engaschament sin il champ dal teater laic cun in premi da promoziun dal chantun Grischun.
RR novitads 17:00