En il studi vegnan ils auturs a la conclusiun che vitgs pli pitschens en las valladas vegnian a vegnir anc pli pitschens, vegnan a perder vinavant prestaziuns da servetsch e che intgins daventian «aclas modernas».
Ils deputads da las differentas regiuns, Kevin Brunold (PCD, Surselva), Enrico Kienz (PLD, Engiadina Bassa) e Walter Grass (PBD, Urmein/Tusaun) èn tuts era da l'opiniun che las regiuns dovrian ferms centers. Betg d'accord n'èn els dentant cun la tesa ch'ils vitgs pli pitschens en las regiuns vegnian vinavant a perder impurtanza e che quai saja d'acceptar.
Era Jon Domenic Parolini betg d'accord
Sco ils deputads dumandads, è era il cusseglier guvernativ Jon Domenic Parolini persvadì ch'i dovra ferms centers en la regiun. Ma era el è da l'opiniun ch'ils vitgs duain exister vinavant. Il chantun haja era l'obligaziun da porscher vias per il traffic mobil e colliaziuns da traffic public. Parolini dubita ch'i saja la dretga via da simplamain acceptar che quels vitgs perdan pli e pli impurtanza.
RR actualitad 12:00