Siglir tar il cuntegn
cuntegn

Chantun L’emprim placat d'elecziun penda gia, u betg?

Tgi che va cun egls attents atras Cuira ha schon vesì l’emprim placat d'elecziun, u betg? En mintga cas è da vesair sin il placat il Cusseglier naziunal da la partida verdliberala Josias F. Gasser davant in da ses autos da vitgira, dasperas la parola «Gasser ist Energie».

Il placat cun il Cusseglier naziunal Josias F. Gasser.
Legenda: Il placat cun il Cusseglier naziunal Josias F. Gasser. mad

Bain di Gasser sez ch’i na saja betg in placat d'elecziun, mabain «ina campagna da image per la Gasser Gruppe». Il politolog e cussegliader da cumbats electorals Louis Perron vesa quai dentant auter. Per el cuntegn il placat las ingredienzas impurtantas per in placat d'elecziun, er sche per exempel la partida ni la data da las elecziuns mancan. Il placat haja persuenter in «chau» ed in slogan cun in messadi da coc politic – in placat d'elecziun «zuppà» pia.

Strategicamain raffinà

«Strategicamain è quai raffinà da vegnir uss schon cun in tal placat e da pender si il placat lura, cura che nagins auters pendan», di Louis Perron. «Uschia na va il placat en mintga cas betg a perder en il guaud da placats da las davosas emnas avant las elecziuns.»

Ch'i saja gist Josias Gasser che haja il sez che balluchia che pendia si l’emprim placat, na saja er betg casualitad, manegia il politolog e cussegliader da cumbats electoral. «Candidats ch’èn periclitads, fan pli intensiv cumbat electoral», di l’expert Louis Perron.