La stad è strusch a fin e gia è arrivada l'emprima naiv. En la gronda part da la muntogna svizra è il cunfin da naiv sa sbassà sin 2'000 meters, en la regiun dal Gottard schizunt anc pli bass. La damaun eri alv per exempel en Val Tujetsch u ad Andermatt ch'è sin 1'400 meters sur mar, uschia communitgescha Meteonews. Sur 2'000 meters hai dà tranter 10 e 30 cm naiv nova. Intgins pass èn stads serrads durant pliras uras.
L'aura dal Telesguard dals 05.09.2019
La notg sin gievgia ha cumenzà l'enviern
Mintg'onn a la fin d ala stad cura ch'i vegn stgir e fraid en il nord, sa sviluppa sur il Pol dal Nord in grond turnigl en l'atmosfera. El sa chatta fitg ad aut en la stratosfera, tranter 8 e 50km autezza. El sa numna tranter auter «Polar Vortex» e procura adina puspè per lingias grassas en las medias, cura ch'i dat l'enviern fasas cun aria fitg fraida.
Sur il Pol dal Nord datti duas fasas en il current da l'aria. La fasa da pressiun auta la stad e la fasa da pressiun bassa l'enviern, cura ch'il vent sufla en direcziun cuntraria a l'ura enturn il Pol dal Nord. Il di da la midada da la pressiun auta a la bassa, marchescha la midada dal semester da stad a quel d'enviern. Questa midada è stada quest onn la notg sin ils 5 da settember.
Tge fa quest turnigl cun noss'aura?
Mintga per onns rumpa quest turnigl dapart amez l'enviern, la stratosfera sa stgauda lura tuttenina per 20 fin 50°C. Malgrà che quest turnigl è plinensi che la sfera nua che l'aura capita, ha quai in'influenza. Sch'il turnigl rumpa dapart, datti tar nus fasas nua che l'aria è fitg fraida e las temperaturas sa sbassan.