Cunzunt en ils sid da las Alps datti blera naiv. Sin ils pass e sin ils auts poi tenor Gaudenz Flury dad SRF Meteo dar enfin in meter e mez. Pli en il nord ch'ins è e pli paucs naiv ch'i dat. Uschia datti en il Grischun Central sur 1'000 meters sur mar tranter 30-50cm naiv. Scrottas poi dentant era dar enfin en la Val dal Rain.
L'intermezzo d'enviern è dentant in curt. Gia venderdi bun'ura vegni sitg en l'entir chantun ed il sulegl sa mussa adina pli savens. La fin d'emna èsi detg sulegliv e las temperaturas creschan puspè.
Privel da lavinas crescha
Cun il return da l'enviern crescha er il privel da lavinas. Uschia annunzia l'Institut federal per la perscrutaziun da naiv e lavinas a Tavau in privel grond da Tujetsch, sur la Val dal Rain enfin en l'Engiadin'Ota e las Valladas talianas. En il rest dal chantun vala in privel da lavinas considerabel, stgalim 3.
Impediments sin vias e binaris
- il Pass Lucmagn e dal Güglia èn serrads per motivs da segirtad
- a partir da las 18.00 è er il Pass dal Fuorn serrà
- per ils pass Malögia, Bernina e Fuorn vala in obligatori da chadainas
- la via tranter Preda e Bravuogn è serrada
- sin l'Autostrada A13 tranter Roveredo e Tusaun vala in scumond da charrar per camiuns cun char annex
- la gievgia circuleschan nagins trens sur il Pass Alpsu – quai pervia da privel da lavinas
RR novitads 17:00++