La situaziun cun il triep da lufs al Calanda en la regiun da cunfin dal Grischun e dal Son Gagl saja fitg calma, di l’inspectur da chatscha grischun Georg Brosi. La problematica dals davos 2 onns, lura avevi dà inscunters betg giavischads tranter umans e lufs, n’hajan els betg observà quest enviern.
Pervi da tals inscunters betg giavischads ha la Confederaziun lubì da sajettar dus lufs giuvens. La finamira da quest’acziun è da spaventar ils ulteriurs animals, uschia ch’els èn puspè temelitgs envers umans. Ils chantuns Grischun e Son Gagl han anc 2 mais peda per l’acziun da disciplinar il triep dal Calanda.
