L'enviern po vegnir - ils maruns èn buns

La qualitad dals maruns è buna quest onn. Betg mo ils maruns da l'Italia, mabain er ils maruns dal Tessin e da Poschiavo èn megliers ch'ils onns passads.

Il stan dals brassamaruns Renate e Remo Berchtold a Cuira. Bild in Lightbox öffnen.

Legenda da maletgs: Els pon vender buns marruns - ils brassamaruns Renate e Remo Berchtold tar lur stan a Cuira. RTR, Maurus Candrian

Suenter che la racolta da maruns è stada nauscha il 2014 e 2015 è la qualitad quest onn meglira. Quai di il brassamaruns Remo Berchtold che ha in stan a Cuira. L'onn passà haja el stuì dismetter circa 30-40% dils maruns, quest onn mo 10-15%.

Berchtold offrescha maruns da l'Italia. Là haja la vespra da gala che attatga ils chastagners ed ils maruns destruì pli pauc ch'ils onns avant.

Dad ina vart na saja l'aura betg stada ideala per la vespra. Da l'autra vart haja ella dapi curt temp in nov inimi en l'Europa - numnadamain ina sort da la vespra satiglia.

Puschlav e Tessin cun buna raccolta

Era en il Puschlav è la racolta stada buna. Quantitativmain na saja la stagiun forsa betg stada in tal success sco en il passà, la qualità constettia dentant. Quai di Nicolò Paganini da l'uniun Castanicoltori di Brusio.

En il Tessin saja dentant era la quantitad buna di Paolo Bassetti che coordinescha ina rimnada privata da chastognas. Uschia hajan els pudì raccoltar circa 5'000 kilos chastognas ch'ins sappia quasi duvrar tuttas. L'onn passà sajan quai stads mo 1'000 enfin 2'000 kilos.

Spetgar e guardar

Sche la raccolta da chastognas tanscha dentant per l'entir enviern n'è betg cler pil mument. Igl è da spetgar e guardar sch'ils maruns restan propi usche buns sco enfin uss. I dat numnadamain bulieus che sa mussan pir intgins mais suenter la racolta.

RR actualitad 07:00