Cun in album da cumià pudessans ins pensar che Roman Flepp, Renzo Hendry e Johannes Just vegnan nostalgics e fan in sguard enavos, ubain faschessan in «Best Of». In zic constat quai era. Cun «Finalas» ubain «Fiug» dechantan els lur temps sco pioniers dal rap rumantsch ed il plaschair e l’energia ch’els paran anc adina d’avair per lur musica.
Han els cun «Analectrica» anc giugà cun tuns electronics ubain èn cun «Analium» ids en la disco, turnan els musicalmain cun l’album final tar lur ragischs. Samples da veglias chanzuns americanas, beats che regordan vid ils onns 90 e parts da rap da Flepp, Jusht ed Orange cumbinà cun refrains che sa tschentan immediat en l’ureglia fan endament als emprims albums «Analogia» ed «Analfabad». Dentant era qua han els experimentar cun novs tuns e geners. Per exempel èsi tar «Pren 2.0» da chattar tuns da la Persia.
Cumenzà ha tut pitschen
Set giuvens en in tschaler a Sedrun – daventà èsi insatge grond. Els han gì concerts sin las grondas tribunas en l'entira Svizra ed in success sur ils cunfins ora. L'onn 2009 èn els perfin stads nominads per il «Swiss Music Award» en la sparta «Best Newcomer». Era sch'i n'ha betg tanschì per l'emprim plaz, han las Liricas betg dà si e producì vinavant buna musica.
Albums
L'emprim album «analogia» è cumparì l'onn 2004. Ils proxims onns èn suandads quatter ulteriurs albums ch'han gì grond success. L'ultim album è stà «banalitad». Quel han els publitgà suenter ina lunga pausa dal 2011 enfin il 2016. Dapi lura èsi stà relativ ruassaivel enturn ils rappers rumantschs. Il 2022 publitgeschan els lur ultim album cul titel «Liricas Analas».
Hit «Siemis»
Enconuschents èn «Liricas Analas» vegnids cun il hit «Siemis». Quel han els era chantà a la sonda lunga da l'onn 2019 tar RTR.
Co ticcan ils rappunz?
Els ticcan different, fitg different e tuttina chattan els dapi l'entschatta ensemen la storta. Ils Cuntrasts han accumpagnà il 2016 ils trais rappunz Orange, Flepp e Jusht.
