Siglir tar il cuntegn
Inhalt

Chantun La demografia decida tgi che survegn e tgi che perda

Ils proxims dus onns èn las vischnancas grischunas obligadas d’elavurar in plan directiv e da controllar las zonas da construcziun existentas. Quai a chaschun da la realisaziun da la lescha da la planisaziun dal territori federala.

Legende: Video Zonas da bajegiar – il chantun preschenta il plan directiv abspielen. Laufzeit 02:52 Minuten.
Or da Telesguard dals 11.11.2016.

La lescha revedida davart la planisaziun dal territori è en vigur dapi il matg 2014. Ella oblighescha ils chantuns d’adattar ils plans directivs ils proxims 5 onns dapi che la lescha è entrada en vigur.

Per il chantun Grischun dat quai grondas sfidas, perquai ch’ì dat en il chantun fitg differentas regiuns cun differenta dinamica, scriva la chanzlia chantunala grischuna. Las zonas d'abitar, da centers u maschadadas èn guardadas sin l'entir Grischun memia grondas. Las reservas na sajan dentant per part betg là nua ch'i fiss bun tenor las prognosas da la populaziun.

Zonas duain vegnir spustadas

Las zonas duain vegnir spustadas davent da las regiuns nua che la populaziun sa sminuescha en regiuns e lieus nua che la glieud va e l'economia sesvilupescha pli fitg. Quai duai succeder uschia che las vischnancas accordeschan lur zonas al diever ch'è propoi avant maun. Da la proposta dal chantun sa tracti dentant anc uss mo dad in sboz. Las vischnancas ston anc prender quel sut la marella e reveder el.

Tenor il sboz dal chantun èn quai 81 vischnancas che han memia bleras zonas, 19 che han memia paucas zonas da bajegiar ed 8 che han gist dretg las zonas. Er vischnancas che han mo pauc memia bleras zonas sa chattan tranter las 81 vischnancas che han memia bler.

Incumbensa a las vischnancas

Las regiuns survegnan uss il pensum d'elavurar in plan directiv territorial entaifer da dus onns. Il sboz dal chantun ston las vischnancas er controllar e reveder. Entaifer da tschintg onns ston els lura reveder lur planisaziun locala. En quest connex ston las zonas vegnir adattadas al basegn ch'è effectiv avant maun en ils proxims 15 onns.

RR novitads 12:00