La gievgia saira ha il CSEM a Landquart – in center da perscrutaziun e svilup – envidà a Trimmis ad ina saira, per discutar davart la digitalisaziun. Ozendi datti pli e pli savens maschinas che pon surprender la lavur da persunas. Pli e pli bler è automatisà. Als experts èsi dentant conscient che la digitalisaziun porta er privels.
Attatgas da cyber, cumplexitad, plazzas da lavur
Bleras firmas han oz gia da cumbatter cun attatgas da cyber. Dieter Conzelmann è CEO da la firma Bizerba Busch a Trimmis, ina firma ch'è sa spezialisada sin indrizs d'embuttigliar. El di ch'il problem cun attatgas da hackers na vegnia il futur segir betg pli pitschen, plitost il cuntrari.
Nus avain regularmain attatgas da hacker.
In'autra sfida ch'è vegnida tematisada durant la discussiun saja la cumplexitad da la digitalisaziun. La maschina remplazza pli e pli fitg il carstgaun. Tenor Harry Heinzelmann che lavura tar il center da perscrutaziun e svilup CSEM a Landquart dettia anc bler tecnologias che n'èn anc betg perscrutadas a fin.
Nus na chapin betg l'entira cumplexitad da tut las maschinas. Quai po schon far in zic tema.
RR actualitad 12:00
