Per l’ina veglia el sa concentrar pli fitg sin sia nova plazza sco manader da fatschenta da la Graduate School a Tavau e per l’autra uschia avair dapli temp per activitads privatas.
Mes basegn persunal dad avair dapli temp per autras activitads professiunalas ed era privatas è la raschun daco ch’jau demissiunesch sco president da la Lia Rumantscha sin la fin da l’onn
Surdar cun fitg buna conscienza
I saja in bun mument da surdar uss ord atgna voluntad la batgetta ad in successur, manegia Duri Bezzola. E quai malgrà ch’el n’haja betg pudì realisar tut las finamiras. Bler saja dentant sin buna via. La Lia Rumantscha saja per exempel ussa en ina situaziun instituziunala fitg solida e sanà.
L’equipa da la Lia funcziuna fitg bain sut la direcziun dal secretari general, Urs Cadruvi ed era la collavuraziun en la suprastanza e da la suprastanza cun las uniuns affiliadas – quai è tut sin buna via!
Cunquai possia el ussa surdar cun fitg buna conscienza ad in successur u successura.
Flury duai daventar successur da Bezzola
Emprim e fin ussa unic candidat per sia successiun è Johannes Flury, l’anteriur directur da la scol’auta da pedagogia ed anteriur president dal cussegl d’administraziun da l’Institut Otalpin a Ftan.
Gugent sfidas
La situaziun a l’Institut Otalpin a Ftan na possian ins dentant betg cumparegliar cun quella da la Lia Rumantscha, constatescha Johannes Flury. I saja en mintga cas pli simpel, cunquai ch’el haja uss cun quest pensum era dapli peda, crai il pensiunà Flury.
Nua che las sfidas da la Lia sajan il mument na possia el dentant betg anc dir – per far quai stuessia el s’approfundir pli fitg en la materia. En mintga cas haja el gugent sfidas.
Davart la successiun da Duri Bezzola decida la radunanza da delegadas e delegads da la Lia Rumantscha, ils 31 d'october 2015 a Mustér.
RR novitads 0:00
