Siglir tar il cuntegn
cuntegn

Chantun La Plima d'aur dat in sguard en il futur

La Lia Rumantscha ha lantschà la concurrenza da scriver Plima d'aur/Pledpierla cun il tema «L'onn 2119 en terra rumantscha». Ils victurs e las victuras dastgan preschentar lur texts al festival da giubileum «100 onns Lia Rumantscha» l'avust a Zuoz.

In uffant che scriva in text en in carnet.
Legenda: Sa participar a la concurrenza da scriver pon uffants e giuvenils tranter 9 e 25 onns. Keystone

Quest onn festivescha la Lia Rumantscha ses 100avel anniversari. Ord quest motiv less ella savair dals uffants rumantschs, co che la terra rumantscha vesa ora l’onn 2119. Quai cun la concurrenza da scriver Plima d’aur/Pledpierla.

Blera fantasia

Carmen Dedual, la manadra da las regiuns da la Lia Rumantscha, spetga dals uffants texts cun blera fantasia. Datti nagins Rumantschs pli, u dapli che ussa? Ils uffants pon scriver raquints, novellas, poesias u istorgias curtas.

Ils victurs dastgan sa preschentar

Uffants e giuvenils tranter 9 e 25 onns pon sa participar. Ils victurs na survegnan betg mo premis tranter 60 e 300 francs, els dastgan era preleger lur ovras a la festa da «100 onns Lia Rumantscha» l’avust a Zuoz. L’ultim termin per inoltrar ils texts è ils 19 d’avrigl 2019.

RR actualitad 08:00