Ils 31 da december 2017 vivevan 197'888 persunas en il chantun Grischun. Quai èn mo 338 dapli che l'onn avant e vul dir, che la populaziun è creschida sut la media. Quest svilup sa mussa er sin livel naziunal: uschia è la populaziun svizra creschida il 2017 per 0,8%. Il pli ferm è la populaziun creschida l'onn passà en ils chantuns Zug e Genevra. Schizunt ina leva reducziun da la populaziun hai dà en ils chantuns Tessin e Neuchâtel.
Pli paucs abitants en sis regiuns
Entaifer il Grischun han las regiuns Plaun e Viamala pudì nudar cun mintgamai 1,6% il pli grond augment da la populaziun. Era creschida è la populaziun da las regiuns Landquart, Moesa e Plessur. En las ulteriuras sis regiuns grischunas è la populaziun sa reducida levamain.
35'038 abitants permanents ha la citad da Cuira dumbrà la fin dal 2017. Quai èn 158 dapli ch'in onn avant. Da las 14 vischnancas grischunas cun passa 3'000 abitantas ed abitants, èn Tusaun e Panaduz creschidas il pli fitg. Las grondas vischnancas turisticas da Tavau, da San Murezzan e d'Arosa han percunter pers abitantas ed abitants.
Damain naschientschas
1'712 uffants èn naschids l'onn passà en Grischun – 94 pli pauc che l'onn avant. En il medem temp hai dà en il Grischun uschè blers mortoris sco anc mai, numnadamain 1'746. Uschia resulta per il chantun in saldo da naschientschas negativ.
Pli paucs immigrants ed immigrantas
Il saldo da migraziun internaziunal – immigraziun da l'exteriur minus migraziun en l'exteriur – ha muntà per il 2017 a mo 1'055 persunas. Il saldo interchantunal è cun - 637 persunas en la dimensiun dals onns precedents. Il dumber da persunas che bandunan il Grischun è pia vinavant pli grond, che quel da persunas che vegnan d'in auter chantun en il Grischun.
Stgars 37'000 burgais esters
Il Grischun dumbrava la fin da l'onn passà 36'903 abitantas ed abitants permanents cun dretg da burgais exclusivamain ester. Quai èn 285 dapli che la fin dal 2016. La gruppa la pli gronda èn ils Portugais cun 9'333 persunas, suandads da las persunas da naziunalitad tudestga (7'434) e taliana (6'584). 444 persunas èn vegnidas natiralisadas l'onn passà, 86 damain che durant l'onn precedent.
Ils detagls davart la populaziun e davart ils svilups demografics
RR novitads 11:00