La posta serrada a Cuira muventa

Dapi ils 5 da november è serrada la posta gronda a Cuira. La glieud passa dentant anc adina cun pachets e brevs u per laschar ora raps dal postomat. Ma era quel è ord funcziun.

Era sche la posta è serrada dapi ils 5 da november è ella anc frequentada bain. Mintga pèr minutas arriva in u l'auter cun brevs u pachets – e stat tut stut davant portas serradas. Er il postomat è ord funcziun.

Las reclamaziuns arrivan, ma betg tar la posta

La posta haja communitgà memia pauc bain ch'ella serra gia il november, rinfatschan ils clients. La posta sez piglia encunter l’infurmaziun ed emprova da meglierar sia communicaziun per in'autra giada.

Ina meglra communicaziun avess er Ivan Stäheli beneventà. Ses affar è en il medem edifizi sco l’anteriura posta. Di per di arriva la glieud vilada cun lur reclamaziuns tar el en biro.

Las reclamaziuns arriavan tar Ivan Stäheli che ha ses affar én il medem edifizi sco che la posta era. Avrir maletg en lightbox.

Legenda da maletgs: Cun lur reclamaziuns van blers tar Ivan Stäheli. RTR, Fabia Caduff

«  Jau ma vegn avant sco in post d’infurmaziun da la posta. Mintga di vegnan silmain 20 persunas vilentadas en mes affar che tschertgan la posta e blastemman. »

Ivan Stäheli
CDC Cuira SA

Per calmar e declerar a tantas persunas pertge che la posta n'è betg pli qua perda Ivan Stäheli adina puspè temp da lavur.

La posta sezza dentant na bada betg bler da quai. Els n'hajan betg survegnì ina massa reclamaziuns, di il pledader da medias da la posta Markus Werner. Dentant displaschi ad el, che Ivan Stäheli survegn tantas reclamaziuns.

Igl è da s’endisar

Actualmain è la posta serrada pir intgins dis e la glieud n'è anc betg disada al midament. Entant èsi anc in ir e vegnir davant la posta.

Sche tut va sco planisà avran las portas da la posta puspè. Lura dentant vegnan ils pachets substituids cun cudeschs. Planisà è che la biblioteca da la citad da Cuira va en l’edifizi vegl da la posta.

RR actualitad 11:00