La PS sa vilenta dals promoturs d'olimpia 2026

Da dumandar daners da taglia per la campagna per gieus olimpics dal 2026 en il Grischun saja impertinent ed in scandal politic, di la partida socialdemocratica dal Grischun.

Purtret da rintgs olimpics betg finids. Bild in Lightbox öffnen.

Legenda da maletgs: La PS grischuna n'ha nagin plaschair da l'idea da dumandar las vischnancas per daners. Keystone

Las vischnancas grischunas han survegnì quest'emna ina brev cun la dumonda da sustegnair la campagna per gieus olimpics 2026. Tenor la Partida socialdemocrata na giaja quai betg da duvrar daners da taglia per finanziar ina tala campagna. Tant pli suenter ch'il suveran era s'exprimì cunter gieus olimpics avant trais onns.

Ultra da quai haja il cusseglier guvernativ Jon Domenic Parolini declerà pir dacurt che la campagna na vegnia betg finanziada cun daners publics. Tar quai resta Parolini er. I saja da differenziar tranter daners publics da la vischnanca e quels dal chantun. «Per nus è quai cler ch'il chantun na dat betg meds finanzials per ina campagna politica, nua ch'il comité va a tschertgar daners è sia chaussa. E sche las vischnancas vulan dar ina contribuziun u betg è er chaussa da las vischnancas», di Parolini.

Intginas vischnancas èn gia sa decididas

Falera, Flem, Laax, Lai e San Murezzan èn directamain pertutgads dals gieus e sustegnan la campagna. Era Scuol e Glion èn sa decidids da pajar. Cuira, Tavau e Lantsch na pajan betg ed era Trun na paja nagut.

RR novitads 09:00