Studis a lung temp, sco quels dal «Robert Koch Institut» en Germania, cumprovan che malsognas psichicas tar uffants e giuvenils èn s'augmentadas considerablamain ils davos onns. Tenor Heidi Eckrich, schefmedia da la KJP Grischun, vala quai era per il Grischun.
Ella quinta cun var 7'000 minorens cun difficultads psichicas. Tenor Reto Mischol, psicolog directiv da la KJP Grischun, han 900 minorens disturbis socials e psichics massivs e bun 1'700 èn pertutgads da deficits da l'attenziun. Las raschuns per l'augment da malsognas psichicas èn multifaras. En la KJP Grischun han ins pudì tgirar e curar l'onn passà pli che 1085 minorens.
Pli baud che nus pudain tractar e pli baud che nus pudain vesair, nua ch'in svilup psichic saun è periclità, e pli autas ch'èn las schanzas da success
Ina buna collavuraziun cun ils partenaris
Per ch'in tractament a temp funcziuneschia dovri ina collavuraziun interdisciplinara cun las instituziuns e las persunas ch'han da far cun l'uffant u il giuvenil, menziunescha il psicolog directiv da la KJP Grischun, Reto Mischol: «Grazia a la cooperaziun intensiva e nunbirocratica cun scolas, servetschs da pedagogia sociala e curativa, cun clinicas e cun ils medis e las medias e blers auters partenaris, sco era cun geniturs e persunas da tgira, èsi pussaivel da s'occupar il pli baud pussaivel cun uffants e giuvenils periclitads psichicamain».
Per Reto Mischol na sa chapescha quai betg da sasez, tant pli lauda el la buna collavuraziun cun ils blers partenaris da la KJP Grischun.
RR novitads 12:00