Il 2007 ha il chantun survegnì l'incumbensa dal parlament d'analisar ed examinar las structuras da la polizia e tut tenor realisar ina polizia unitara. Il schef dal Departament da giustia, segirezza e sanadad, Christian Rathgeb, ha preschentà il rapport da polizia che la regenza ha approvà.
Il rapport «Polizia dal Grischun 2015plus» mussa ch'il sistem da polizia dal chantun resguarda ils giavischs essenzials d'ina polizia unitara. L'incumbensa per il rapport era vegnida da la regenza sezza. La finamira era da cumparegliar la situaziun cun l'organisaziun en auters chantuns.
Las vischnancas han actualmain la pussaivladad da surdar lur incumbensas da polizia sin basa voluntara a la polizia chantunala. Viceversa ha il chantun er la pussaivladad da delegar en cas excepziunals incumbensas da la polizia chantunala a las vischnancas.
Pliras mesiras per optimar la collavuraziun
Uschia duai la responsabladad che las vischnancas han per lur territori pertutgant il sectur da la polizia da segirtad vegnir accentuada e la situaziun giuridica gia existenta duai daventar pli chapaivla. Sco ulteriura mesira duain ils contracts cun las vischnancas vegnir promovids. Quai er en connex cun fusiuns da vischnancas ed cun la regiunalisaziun d'incumbensas communalas. Las structuras regiunalas duain vegnir rinforzadas er territorialmain.
Ultra da quai sto vegnir cuntinuada ed optimada la cooperaziun cun la polizia da la citad da Cuira. Per quest intent è vegnì cumplettà il contract da collavuraziun, scriva la regenza grischuna.
RR novitads 12:00