Siglir tar il cuntegn

Chantun La regenza grischuna vul introducir l’e-voting

La regenza ha deliberà la missiva tar la revisiun parziala da la lescha davart ils dretgs politics en il chantun Grischun per mauns dal Cussegl grond. La revisiun duai pussibilitar l'e-voting.

Ina persuna survegn il code per votar electronic
Legenda: Tgi che vul votar electronic sto l'emprim sa registrar. Keystone

In punct central da la revisiun parziala davart ils dretgs politics è da stgaffir la basa legala per introducir il votar electronic en il Grischun. En in segund pass l’onn 2018 duai vegnir acquistà il sistem dad e-voting che pussibilitescha a tut tgi che vul da votar electronic. Sco il chantun intunescha haja la segirezza en quai connex emprima prioritad.

Plinavant è planisada ina procedura d'annunzia per candidats en cas d'elecziuns da maiorz sin plaun chantunal u regiunal. Uschia vegnian realisadas las premissas per pudair dar giu la vusch a moda electronica tar elecziuns.

Fasa da test

L'onn 2020 duai cumenzar ina fasa da pilot cun sis vischnancas, ed a partir da l'onn 2021 è planisà da far diever dal sistem er en las ulteriuras vischnancas. Las vischnancas duain pudair decider sezzas, sche ed en tge dimensiun ch'ellas vulan introducir il e-voting. Era sch’ellas vulan duvrar quellas per votaziuns communalas u betg. Vischnancas ch'introduceschan il e-voting duain survegnir contribuziuns chantunalas unicas per far las adattaziuns necessarias da lur software.

Il Cussegl grond vegn a tractar il project en la sessiun da favrer da l'auter onn. Avant era gia diversas giadas vegnì discussiunà davart l'introducziun dal vuschar electronic.

RR novitads 10:00