Siglir tar il cuntegn
Inhalt

Chantun La sessiun da primavaira è averta

Glindesdi suentermezdi ha la sessiun d'avrigl dal Cussegl grond cumenzà. Sin il plan da lavur èn dentant be incumbensas e dumondas.

Deputadas e deputads dal Cussegl grond en il Cussegl grond.
Legenda: Las deputadas ed ils deputads èn sa rimnads per la sessiun d'avrigl. RTR, Nadja Cadonau

Il president dal Cussegl grond Martin Aebli ha avert glindesdi suentermezdi la sessiun da primavaira. En ses pled d’avertura ha el fatg attent con impurtant che quai saja da na betg perder la colliaziun quai che pertutgia la digitalisaziun. Las sfidas sajan per l’ina da renovar l’infrastructura, dentant er da procurar per la segirezza da las datas sco er da pudair duvrar las datas da moda nizzaivla. Quai per exempel en il sectur da sanadad.

Ina «mini-sessiun» cun be incumbensas e dumondas

Las incumbensas e dumondas che las deputadas ed ils deputads dal Cussegl grond han da tractar ils proxims dus dis èn davart differents temas. Per exempel vul il deputà Andri Perl da la PS da Cuira savair, tge che capita cun las immobiglias dal chantun cur ch'il center nov «Sinergia» vegn retratgs. Il deputà Alessandro Della Vedova percunter vul savair sch' il Grischun possia esser il lieu per manar atras ils proxims World Skills.

Il Cussegl grond vul dapli

Er sin il plan dal Cussegl grond è in'iniziativa parlamentara dal deputà da la PLD Walter Vetsch. El vul, che la regenza mettia a disposiziun las ordinaziuns ch'ella relascha al parlament per che quel possia far in veto aifer 30 dis. Quai cuntrafetschia dentant a la constituziun ha ditg l'anteriur derschader federal Giusep Nay envers il Bündner Tagblatt. Il Cussegl grond sa maschadass uschia en la cumpetenza da la regenza.

RR actualitad 12:00