Insaquants han stuì bandunar la Somedia, auters èn ids pli baud en pensiun, anc auters han midà en in'autra partiziun. En tut èn dentant vegnids stritgads 500 pertschient da plazzas, quai che correspunda a 5 plazzas cumplainas, sin las redacziuns print da la Somedia. Tge redacziun ch'è quant pertutgada, na di Andrea Masüger, il CEO da la Somedia betg. Dentant il pli ferm haja tutgà la "Südostschweiz SO"
5% damain abunents tar la "Südostschweiz"
Il motiv principal per las mesiras da spargn è la mancanza da rendita tar ils abunaments. Sco il trend en l'entira Svizra, saja er il consum dal lectur grischun sa midà ed ils abunaments sajan ids enavos. Quants abunaments che las gasettas da la Somedia han pers, na di Masüger er betg.
Be tant: La media da las gasettas svizras saja ina sperdita da tranter 2 e 3 pertschient. Uschè nausch na saja betg stà tar la Somedia - respectiv tar tut las gasettas da la Somedia. Sco quai che Martina Fehr, la chauredactura da la gasetta "SO" conferma dentant, haja "sia" gasetta pers dapli, numnadamain vers 5 pertschient dals abunents.
En avegnir dapli spazi al Grischun
Perquai saja la finamira uss da puspè chattar novs abunents. Quai vul la SO far cun vegnir danovamain pli regiunala. Il client principal da la gasetta veglia numnadamain pli bleras infurmaziuns dal Grischun, di Martina Fehr.
RR novitads 17:00