Suenter passa 30 onns tar il chantun, pli exact tar l’Uffizi da guaud e privels da la natira, va l'inschigner forestal Magnus Rageth la fin dal mais d’avust en pensiun. Ils pli interessants onns, cun il pli grond eveniment en sia carriera, èn dentant stads ils davos sis onns.
La sfida da la Val Parghera
Cun la bova da la Val Parghera il 2013 ha Magnus Rageth gì ina pulita sfida. Curt avant la pensiun po el dentant serrar giu quest project cun surdar ils indrizs da protecziun a la vischnanca da Domat:
Surdar il project Val Parghera a la vischnanca è in grondius sentiment.
Quasi di per di bovas ...
Dapi il 2013 avevi dà durant quatter onns bunamain mintga di bovas, cunzunt la primavaira e l'atun. Rumir quellas è stà ina sfida supplementar, cunquai ch'ils batschigls da tschiffada eran fitg limitads. Quels han ins engrondì permanentamain e construì ina punt provisorica.Il material han ins deponì sin l'intschess da Plarenga.
... e 26 milliuns per mesiras da protecziun
Il sistem da protecziun ch'è vegnì surdà uss a la vischnanca da Domat cumpiglia in reservuar per 170 000 meters cubic material, in chanal che maina aua en il Rain e differents rempars. Tut quai ha custà 26 milliuns francs.Dapi las emprimas bovas dal 2013 è vegnì construì permanentamain vi dal project Val Parghera. Las lavurs vegnan finidas la fin da l'onn 2019.
Las bovas ed il sistem da protecziun han midà fermamain la cuntrada tranter Cuira e Domat.
RR actualitad 12:00