Mo trais dis suenter l’ultima votaziun federala èn radund 200 persunas sa radunadas a Cuira per dar l’attatga al proxim cumbat da votaziun per in grond project federal. «Occurrenza refurma da taglia sin interpresas III» è stà il titel sitg dad in’occurrenza en l'auditori da la Banca Chantunala GKB a Cuira. Envidà a quest'occurenza ha la Chombra da commerzi ed associaziun dals patruns dal Grischun.
Johann Schneider-Ammann: «Ensemen per jobs e noss pajais»
Per quest’occurrenza è arrivà a Cuira nagin auter ch’il president da la Confederaziun, Johann Schneider- Ammann. En ses pled introductiv ha el discurrì cun insistenza a favur da la refurma da taglia sin interpresas III. Dad acceptar questa refurma saja d'impurtanza eminenta per l’avegnir da la Svizra e da sia bainstanza.
Barbara Janom Steiner: «La Svizra è in lieu attractiv per interpresas»
E per che quai restia uschia, èn era ils chantuns svizzers da l’avis, che la refurma da taglia sin interpresas III saja indispensabla per l’avegnir, ha explitgà la ministra da finanzas grischuna, Barbara Janom Steiner. Ensemen cun la regenza grischuna è ella cleramain da l’avis, che la refurma saja necessaria.
Magdalena Martullo-Blocher vs. Peter Peyer – battidas da dretga e sanestra
Suenter dus referats stagnads da cifras e calculaziuns ha i dà ina discussiun ch’era tut autra che sitga. Deputà e sindicalist Peter Peyer (PS) n’ha regalà nagut a sia contrahenta, cussegliera naziunala Magdalena Martullo-Blocher (PPS/GR).
Finalmain haja el uss er l’occasiun da dir per tge ch’i giaja insumma, suenter tut questas infurmaziuns a favur da la refurma da taglias III – uschia l’emprim votum da Peyer. Insatgi haja da pajar las taglias che giajan a perder, e quai saja la classa mesauna. «E tgi paja, sche las interpresas passan? Nus tuts!» era la replica da Martullo-Blocher.
La mesemna saira ha mussà: Er sche la debatta per u cunter la refurma da taglia sin interpresas vegn ad esser tecnica e plain cifras – per chaus cotschens riva ella da procurar senz’auter fin almain ils 12 da favrer 2017. Quai è il termin da votaziun en chaussa.
RR Actualitad 7:00