Siglir tar il cuntegn
Inhalt

Chantun Las schanzas da la mobilitad electrica en il Grischun

Il chantun vesa ina schanza en la mobilitad electrica e vul perquai engrondir la rait per chargiar autos electrics.

Legende: Video Il Grischun vul promover la mobilitad electrica abspielen. Laufzeit 01:06 Minuten.
Or da Telesguard dals 20.11.2017.

La regenza dal chantun Grischun vesa ina gronda schanza en la mobilitad electrica. L'electrificaziun da la mobilitad pussibiliteschia da concepir il sectur da traffic a moda pli effizienta areguard l'energia sco er da promover in traffic che tegnia meglier quint al clima e a l'ambient. Actualmain munta il dumber d'autos electrics en Grischun mo ad in promil da tut ils autos sin via. Tar ils autos ibrids, pia autos ch'han ina tracziun cumbinada d'in motor termic ed in electric, munta la cumpart a tschintg promil. Finamira dal chantun èsi d'augmentar la cumpart dals vehichels electrics e perquai ha el elavurà in pachet da mesiras sistematicas.

Schlargiar la rait da las staziuns da chargiar

Ina raschun per il bas dumber d'autos electrics en Grischun è la mancanza da staziuns da chargiar. Uschia dettia quai il mument 90 staziuns da chargiar en il chantun. Uss vul il chantun sco mesira per promover ils autos electrics schlargiar la rait da talas staziuns. Il chantun sco concedant procura per l'installaziun da chargiar d'auta prestaziun per lung la A13. Plinavant promova il chantun l'installaziun da staziuns da chargiar svelt per lung las vias da transit (senza la A13). La cumpra da sistems da chargiar duai vegnir sustegnida finanzialmain dal chantun. Sco puncts strategics pussaivels numna il chantun: Mustér, Claustra, Zernez e Puntraschigna. Previs è era ina cuminanza d'interess che duai s'occupar cun il svilup da la rait da staziuns da chargiar tenor criteris unitars. Quants daners ch'il chantun vul impunder per quellas mesiras n'ha ella betg declerà a la conferenza da medias.

Chantun sco bun exempel

L'administraziun chantunala vul ir ordavant cun il bun exempel ed era augmentar l'agen dumber d'autos electrics. Actualmain posseda il chantun trais autos electrics ed in auto ibrid. Medemamain duain vegnir mess a disposiziun staziuns da chargiar tar ils edifizis da l'administraziun. Uschia vegnia stgaffida ina purschida per las collavuraturas ed ils collavuraturs sco er per la clientella. Il dals puncts fix sin l'axa da temp per realisar il management da mobilitad è l'inauguraziun da l'edifizi administrativ «sinergia» en circa dus onns.

RR novitads 10:00