Siglir tar il cuntegn

Header

Monica Fehr cun sprezzas da vaccinar.
Legenda: La presidenta da l'Uniun d'apotechers grischuna, Monika Fehr, porscha en sia apoteca la pussaivladad da vaccinar cunter la grippa. RTR, Flurin Clalüna
cuntegn

Laschar vaccinar en l'apoteca «Nus avain adina dapli persunas che vegnan tar nus»

Dapi 2016 èsi pussaivel da laschar vaccinar en l'apoteca, tranter auter cunter la grippa. Quella purschida saja dumandada, di la presidenta da l'Uniun d'apotechers grischuna, Monika Fehr.

Cura che las apotecas han survegnì il 2016 la cumpetenza da virolar n'era questa purschida anc betg dumandada. Ma ussa datti adina pli e pli blers, da tutta vegliadetgna, che fan diever da quella purschida:

Nus avain mintga di circa diesch persunas che laschan virolar.
Autur: Monika Fehrpresidenta Uniun d'apotechers grischuna

Betg en tuttas apotecas grischunas pussaivel

La pussaivladad da vaccinar datti mo en quellas apotecas, nua ch'insatgi dal persunal ha fatg la scolaziun supplementara. Quella scolaziun ha pliras parts: Ins sto emprender blera teoria davart vaccinaziuns en general, savair co reagir en in cas d'urgenza (p. ex. sche insatgi na reagescha betg bain sin la vaccinaziun u daventa schizunt allergic) e lura natiralmain era savair co sprizzar endretg.

Bleras apotecas en il Grischun han insatgi che ha fatg la scolaziun. I dat dentant era regiuns, nua ch'i na dat nagina pussaivladad da laschar vaccinar en ina apoteca, per exempel en l'Engiadina Bassa, en il Grischun Central u en la regiun dad Arosa. L'uniun chantunala veglia dentant betg sa maschadar en qua, quai saja la chaussa da las apotecas.

Tgi paja?

Puncto finanziaziun datti tenor Monika Fehr anc potenzial da sa meglierar. Insaquantas cassas da malsauns surprendian ils custs da circa 40 francs per virola cunter la grippa, autras dentant betg. Sia finamira è da persvader tuttas cassas da surpigliar quels custs.

RR actualitad 12:00