Laschar valitar la chasa vegn pli favuraivel

Las deputadas ed ils deputads dal Cussegl grond han revedì parts da la lescha da l’assicuranza d'edifizis e la lescha per stimaziuns uffizialas. En il futur pajan possessurs d'edifizis damain per laschar valitar lur immobiglia.

Chamonas cun bler naiv Bild in Lightbox öffnen.

Legenda da maletgs: Era chamonas, edifizis d'alp e stallas ston en il futur tut tenor vegnidas assicuradas. Keystone

Ils deputads han revedì parzialmain la lescha per l'assicuranza d'edifizis e totalmain la lescha per stimaziuns uffizialas. Il Cussegl grond ha gist cumbinà questas duas revisiuns, perquai che l'Uffizi per stimaziuns e l'Assicuranza d'edifizis han en il futur cuminaivel ina banca da datas ed in program. Perquai sa mida tar l'Uffizi per stimaziuns er la repartiziun dals custs. Vul insatgi laschar valetar l'immobiglia forsa perquai ch'el vul vender ella, sto el pajar sez la valitaziun. Tar tut las valitaziuns regularas sto il possessur dentant pajar en il futur damain. Il turnus da diesch onns per las valitaziuns resta tuttina.

Damain plazzas da lavur

Pervi dal nov program e la collavuraziun cun l'Assicuranza d'edifizis ha l'Uffizi per stimaziun er reducì 8,5 plazzas da lavur. I saja anc planisà da reducir dapli en il futur. L'Uffizi per stimaziun mida era ses num - en il futur sa numna el Uffizi per valitaziun d'immobiglias.

Er chamonas èn tut tenor d'assicurar

Er tar l'Assicuranza d'edifizis ha quai dà midadas en la lescha. Nov è che tut ils edifizis d’alp, las stallas e chamonas ch’èn pli datiers che 100 meters dad in edifizi obligà da s’assicurar ston er vegnir assicuradas. Nov è er che quai duai dar impuls finanzials per possessurs, da prender mesiras da prevenziun encunter donns elementars.

RR novitads 20:00