En las alps dal Vallais, Uri, Glaruna e Son Gagl schizunt fin 70 cm. Quai tenor l'institut da naiv e lavinas a Tavau. Cunquai ch'i vegn anc spetgà ulteriura naiv sur 1'600 meters, perfin fin 80 cm ed er pervi dals ferms vents en muntogna ha l'institut fixà per la gronda part dal Grischun in privel da lavinas grond, stgalim 4.
Tenor il prognosticher da lavinas Benjamin Zweifel vegnia il privel però a sa reducir gia sin mesemna u gievgia puspè. Sur 1'500 meters quinta el numnadamain che la naiv nova vegnia a sa tschentar bain e svelt.
Pli a bass strusch in privel
Sut 1'500 meters na saja la naiv nova strusch in privel perquai che quella crodia sin plaun aper. Là possia quai sin il pli dar in u l'auter sbuvaditsch sin parads glischs. Il mument existia il privel propi en ils auts entras il quantum naiv nova en cumbinaziun cun ils ferms vents.
Far attenziun ston cunzunt skiunzas e skiunzs. Tenor Benjamin Zweifel dovri gronda experientscha per ir en questa situaziun dasper pista cun skis. Ed actualmain saja er fitg grev da s'orientar pervi da la tschajera ed ils vents che chaschunan cuflads. Il meglier saja da restar sin las pistas marcadas.
RR novitads 09:00+