Siglir tar il cuntegn

Header

cuntegn

Chantun Lavur curta - prescripziuns restan malgistas

L'ultim enviern è sta in enviern dir per bleras pendicularas, ustarias e fatschentas da sport. Perquai han ils chantuns da muntogna pretendì che la Confederaziun schluchia las reglas da lavur curta per gestiuns dependentas da la naiv. La Confederaziun na vesan dentant betg propi in basegn.

Sin iniziativa dal Grischun han quasi tut ils cussegliers guvernativs da l'economia dals chantuns da muntogna suttascrit ina brev a cusseglier federal Johann Schneider-Ammann. Quai cun il giavisch da schluccar las reglas pertutgant lavur curta per gestiuns dependentas da la naiv. Ils 11 da november è Jon Domenic Parolini ed il schef da l'Uffizi da lavur, Paul Schwendener, s'inscuntrads cun Johann Schneider-Ammann.

Betg il medem sco industria ed autras branschas

Sco Jon Domenic Parolini di, na fiss in sustegn per las pendicularas tenor la Confederaziun betg il medem sco per l'industria u per l'economia forestala. Tar las pendicularas mentegness'ins structuras e tar autras branschas plazzas da lavur stablas sur onn.

audio
Mezdi: Confederaziun na vul betg schluccar las regals da lavur curta per pendicularas
ord Actualitad dals 24.11.2016.
laschar ir. Durada: 2 minutas 48 Secundas.

Ils chantuns da muntogna vesan quai però auter. Tenor els periclitass ins structuras economicas d'entiras regiuns sche las pendicularas ston cumbatter per l'existenza pervi da singuls onns cun mancanza da naiv. I na saja er betg l'idea da subvenziunar pendicularas sche la naiv manca pervi da la midada dal clima. Lura fissi da chattar in'autra soluziun, uschia Jon Domenic Parolini.

Betg anc giud maisa

Sco il cusseglier guvernativ Jon Domenic Parolini ha ditg, cuntinueschian ils discurs. La Confederaziun haja empermess da metter sin palpiri l'entira situaziun. En quest palpiri spera Parolini lura er da chattar pussaivlas soluziuns. Per il cas ch'i na dess nagina soluziun cun la Confederaziun, pruvassan ils chantuns da muntogna da chattar quella sur il parlament, uschia Parolini vinavant.

Enviern passà ha dà l'impuls

Passa 30 pendicularas, ustarias e fatschentas da sport avevan dumandà il chantun per indemnisaziuns da lavur curta suenter l'enviern passà. Survegnì avevan be tschintg ina pitschna summa perquai che las reglas èn fitg strictas. Las reglas pertutgant lavur curta èn pli strictas per gestiuns dependentas da la naiv che per l'industria u per l'economia forestala.

RR actualitad 12:00

Artitgels legids il pli savens