L'obligatori da scolina vegnia discussiunà en il rom da la proxima revisiun da la lescha da scola. Là hajan tut las partidas da pigliar posiziun en la consultaziun e suenter decidia la regenza lura tge che vegnia en la missiva per mauns dal Cussegl grond. Uschia il cusseglier guvernativ e minister d'educaziun Jon Domenic Parolini.
Sper la pretensiun da l'obligatori vesa el er il basegn da discussiunar co quintar il temp da lavur da mussadras e mussaders sco er l'egualitad da pajas en cumparegliaziun cun magistrAs primarAs.
Però quai na vul betg dir che la revisiun da la lescha vegnia durant l'onn che vegn. Quai è in process che dura anc in temp fin che nus pigliain per mauns la revisiun parziala.
Tradiziun sco motiv per retard
La raschun ch'il Grischun è en divers champs areguard la scolina en retard cumpareglià cun auters chantuns, è tenor Jon Domenic Parolini l'istorgia u la tradiziun. En il Grischun saja la scolina sa sviluppada or da organisaziuns da dunnas ed autras organisaziun, che n'eran betg sut la controlla dal stadi. Cun vesair che la scolina daventia adina pli e pli impurtanta en la via da furmaziun, saja quai però sa midà pass per pass. Uschia saja uss er impurtant da discussiunar las pretensiuns che sajan sin maisa.
Las ultimas pretensiuns da la magistraglia
En emprima lingia pretenda l'uniun che la scolina grischuna daventa obligatoria sco en tut ils auters chantuns en Svizra. La lescha da scola cuntegna in'obligatori da porscher ina scolina, e 99,5% dals uffants grischuns visetian ina scolina, scriva LEGR. I saja perquai atgnamain ina pitschna chaussa formala.
In'autra pretensiun che la Magistraglia grischuna surdat al Departament d'educaziun, cultura e protecziun da l'ambient è ch'era las mussadras duain instruir en lecziuns da 45 minutas e betg en uras. Ed ellas duain er avair tuttina bleras lecziuns ad emna sco ils magisters e las magistras sin ils auters stgalims da scola.
Paja
Atgnamain tutgia tar il pachet da pretensiun er ina paja adequata, scriva l'uniun da magistras e magisters. La LEGR ha inoltrà avant dus onns in plant da discriminaziun, che prenda en il focus la paja da mussadras ch'è en l'entira Svizra la pli bassa. Il plant è anc pendent tar la Dretgira administrativa, ord quai motiv na saja la paja actualmain betg tranter lur pretensiuns politicas, scriva la LEGR.
RR novitads 09:00
