La lescha per cumbatter il terrorissem ha la finamira da franar ils plans d'attentaders e terrorists avant ch’els capitan. A las partidas giuvnas svizras dals Verds e Verd liberals sco era als giuvens socialists na plascha quai betg, els han perquai lantschà il referendum. La lescha giaja memia lunsch e cuntrafetschia als dretgs fundamentals.
En direcziun d'in stadi da polizia
Ils giuvens verd-liberals dal Grischun èn sco lur partida-mamma cunter la lescha. Il president Ruben Garbade declera che la polizia pudess duvrar diversas mesiras senza il consentiment d’ina dretgira. Quai cuntrafetschia als dretgs fundamentals. Uschia che la Svizra s’avischinass ad in stadi da polizia.
Cun questa lescha fiss la Svizra sin il medem nivel sco l’Arabia Saudita.
La polizia pudess per exempel gia tar supposiziuns terroristicas limitar ad ina persuna davent da 12 onns il radius da moviment. Quai saja era problematic per la reputaziun internaziunala da la Svizra. Pliras organisaziuns internaziunalas per la protecziun d’uffants e dretgs fundamentals dettian alarm. Era la partida giuvna liberaldemocratica ed ils giuvens socialdemocrats èn dal medem avis. Plinavant crititgeschan las partidas giuvnas che la lescha na suondia betg il principi da la presumziun d’innocenza. Vul dir: Las persunas che vegnan accusadas ston cumprovar ch’ellas n'hajan da far nagut cun il terrorissem.
Reagir svelt per la segirtad
Auter vesa quai la Partida populara giuvna dal Grischun. Tenor il president Sandro Schmid saja quai bun che la polizia haja a disposiziun ina gronda schelta da mesiras. Uschia pudess ella tscherner l'adattada per il cas singul. Medemamain saja in grond agid che la polizia na stoppia betg consultar la dretgira avant che prender mesiras uschia ch’ins po reagir pli svelt. Quai saja impurtant per ch’ins possia franar ils plans d’in attentat baud avunda.
Sch’ins spetga sin il consentiment d’ina dretgira fissi en il mender cas gia memia tard.
La presumziun che la Svizra daventass in stadi da polizia na lascha Sandro Schmid betg valair. Mintga mesira possia vegnir contestada giuridicamain da las persunas pertutgadas.
La Svizra n'è betg immuna dal terrorissem
Era las partidas giuvnas grischunas dals burgaisdemocrats e cristiandemocrats èn per la lescha d’anti-terror. Ins na dastgia betg emblidar che terrorists cun plans d’attentats pudessan medemamain avair la Svizra en mira declera Fabian Collenberg, il president da la PCD giuvna. Gist tar ils eveniments gronds dal Grischun sco il Maraton da skis engiadinais u la Cuppa Spengler dastgass ins gnanc imaginar las consequenzas d’in act da terror. Uschia ch'ins stoppia acceptar tschertas restricziuns da libertad ch'èn en favur da la segirtad dal pajais.
