Siglir tar il cuntegn

Header

cuntegn

Lescha da CO2 Il Grischun patescha – e profita

Exponents da tuttas partidas battan en il comité «Gea a la lescha da CO2». Lur messadi: Il Grischun patescha da la midada dal clima. Ed il Grischun profitia da la lescha da CO2.

Las temperaturas en las cuntradas alpinas s'augmentian pli fitg ch’en autras cuntradas. Ils glatschers lieuian ed i dettia dapli bovas.

Las consequenzas negativas da la midada da clima sajan in privel per la populaziun muntagnarda, gliez hajan ins vis en Bregaglia, ha ditg Anna Giacometti, cussegliera naziunala da la PLD.

audio
Lescha da CO2: Il Grischun patesche – e profita
ord Actualitad dals 11.05.2021.
laschar ir. Durada: 3 minutas 43 Secundas.

Populaziun survegn dapli daners

La populaziun profitia surproporziunalmain da la lescha da CO2, ha ditg Jon Pult, cusseglier naziunal da la PS. Passa la mesadad dals daners da la taxa da CO2 flueschia enavos a la populaziun svizra.

Damai ch’ils Grischuns sgolian pli pauc cumpareglià cun la media da la Svizra e perquai che blers proprietaris grischuns stgaudian gia oz cun energia regenerabla, retschaivian ils Grischuns dapli daners da la taxa da CO2.

Vischnancas survegnan agid

Cun undas da chaliras e daratgadas sajan las vischnancas pertutgadas directamain, ha ditg Carmelia Maissen da la PCD e presidenta communala da Glion. La midada da clima chaschunia custs pli auts per mantegnair vias, guauds e rempars.

Sche nus n’agin betg spert, creschan ils custs en l’infinit
Autur: Carmelia Maissen presidenta communala da Glion

Co-presidi cun exponents da 7 partidas

Sper Anna Giacometti, Jon Pult e Carmelia Maissen s’engaschan en il co-presidi dal comité era Ursin Widmer da la PBD, Dario Cao da la PPS, Anita Mazzetta da la Verda e Jürg Kappeler da la PVL – pia exponents da tuttas partidas dal Cussegl grond.

L’impressari Dario Cao da la PPS è persvadì da la lescha da CO2 malgrà che sia partida ha prendì la parola encunter. Il suppleant da la Val Poschiavo posseda ina fatschenta da tecnica da chasa che porscha gia dapi onns stgaudaments cun energia regenerabla ed indrizs solars.

RTR actualitad 17:00

Artitgels legids il pli savens