Tenor la Confederaziun èn surtut persunas sur 65 onns periclitadas dal coronavirus. Cunter questa classificaziun pauschala da persunas pli passadas, sa dosta l’anteriura cussegliera federala, Evelyne Widmer-Schlumpf, che presidiescha la Fundaziun svizra Pro Senectute. I saja memia rigurus da quintar tut las 1,6 milliuns persunas en vegliadetgna da pensiun tar l’uschenumnada gruppa da risico, sulettamain pervi da lur vegliadetgna. La glieud vegnia pli veglia a moda differenta. Quai ha ditg Widmer-Schlumpf en in’intervista cun il «SonntagsBlick».
La Pro Senectute saja s’engaschada cun success da reponderar questa clausula da vegliadetgna. Uschia saja numnadamain gartegià da stritgar la limita da vegliadetgna da 65 onns ord la nova lescha da Covid-19. Quella lescha tracta il parlament en sia sessiun d’atun che cumenza damaun, glindesdi, e dura enfin ils 25 da settember.
