Siglir tar il cuntegn
cuntegn

Chantun Lescha da persunal dal chantun vegn revedida

La regenza ha approvà il messadi davart la revisiun parziala da la lescha per mauns dal Cussegl grond. Tranter auter duai vegnir stritgà l’automatissem che 1% dal budget sto vegnir impundi per il svilup dals salaris.

La scola chantunala ed il Hof a Cuira.
Legenda: En futur è la direcziun da la scola chantunala responsabla per l'engaschi dals scolasts e betg pli il chantun. RTR, F. Belotti

Plinavant duai vegnir meglierà la protecziun da datas e da dretg sco er la protecziun da dunnas en speranza, quai scriva la regenza grischuna.

La revisiun prevesa las suandantas midadas:

  • L'automatissem, tenor il qual la summa dals salaris vegn auzada mintga onn per 1 pertschient per il svilup dals salaris, vegn abolì.
  • La regulaziun d’occupaziun accessoricas vegn cumplettada cun in’obligaziun generala d’annunzia.
  • Per elavurar datas persunalas quai surtut per manar sistems electronics d’infurmaziun vegn stgaffi las basas giuridicas.
  • La protecziun giuridica vegn concepida confurm a la constituziun, uschia po en futur er vegnir fatg recurs tar ina dretgira chantunala superiura.
  • Per l’engaschament e la disditga da plazzas d’instrucziun a las scolas chantunalas è da nov la direcziun da las scola responsabla.
  • Per meglierar la cumpatibilitad da la professiun cun la famiglia vegn extendì il congedi da maternitad ed era il congedi da paternitad e d’adopziun vegn francà explicitamain en la lescha.

Il Cussegl grond tracta la fatschenta en sia sessiun d'avust. La revisiun da la lescha duai ir en vigur sin il prim da schaner 2017.

RR novitads 09:00