La surveglianza da video en il spazi public vegn schlargiada. Era sche surtut la fracziun socialdemocratica è stada sceptica ed ha fatg attent sin la sfera privata, è la maioritad dal Cussegl grond stada da l'avis che la polizia e las autoritads stoppian pudair nizzegiar las novas tecnologias per garantir la segirtad.
Policistas e policists cun bodycams
In ulteriur punct che hà dà da discutar aifer la lescha da polizia èn stadas las uschenumnadas bodycams. Malgrà che l'Uniun grischuna da policists era cunter bodycams, han ils deputads e las deputadas decidì da lubir talas.
Il president da l'uniun Remo Cavegn (PCD) è sa dustà en la debatta: El dubita, ch'il respect vers policists creschia, sch'i vegnia filmà. Ultra da quai disturbia ina tala camera ils policists en lur lavur da mintgadi. Sia proposta da desister da bodycams han deputadas e deputads refusà cleramain cun 90 cunter 23 vuschs.
Ils aderents, inclusiv il directur da polizia Christian Rathgeb (PLD), han argumentà ch'ins haja dapli respect envers la polizia, sch'ins sappia ch'i vegnia filmà. E per cas ch'i schabegia tuttina insatge, saja suenter pli simpel d'identifitgar ils delinquents.
Nagin scumond da cuvrir la fatscha
Proponì in scumond da cuvrir las fatschas durant demonstraziuns aveva la Partida cristiandemocratica – e quai cun l’argument che la polizia possia uschia identifitgar ed isolar persunas che fetschian part a demonstraziuns mo per randalar.
La maioritad dal Cussegl grond è dentant da l’avis, ch’il Grischun n’haja nagin problem cun caots e na dovria era nagin scumond da cuvrir la fatscha. Els han perquai la gievgia suentermezdi refusà in tal scumond cun 61 cunter 53 vuschs, tar 5 abstenziuns.
RR novitads 16:00
