La taglia da gudogn vegn sbassada sin 4,5%. La regenza aveva proponì da sbassar la taglia sin gudogn per interpresas da 5,5 sin 4%. L'argumentaziun dals burgais è stada clera, uschia duai il chantun daventar pli attractiv per firmas. E dapli firmas procurian per dapli plazzas da lavur e la finala er per dapli entradas da taglia.
Sper quai ha il Cussegl grond er sbassà l'imposiziun da taglia da dividendas da 60 sin 50%. Là giaja en emprima lingia per betg chastiar dublamain l'economia.
Igl ha dentant betg be dà zutgers per las interpresas, mabain er per persunas privatas. Il Cussegl grond ha numnadamain auzà l'import liber da taglia da 15'000 francs sin 15'500 francs. Vul dir: Sin ils emprims 15'500 francs ch'ins gudogna na ston ins betg pajar taglia.
Las opiniuns aifer ils burgais ed ils socialdemocrats en il Cussegl grond èn ina giada dapli idas dapart. Quai ha chaschunà discussiuns tar la revisiun da la lescha da taglia.
Probabel nagin referendum
La partida socialdemocratica aveva ordavant smanatschà ch'ella veglia inoltrar il referendum, sch'ella na giaja betg d'accord cun la revisiun. Tenor Lukas Horrer, ch'è stà per ils socialdemocrats en la cumissiun preparatorica, na proponian els dentant nagin referendum. Il pled final haja dentant la partida sco tala.
Sch'i na dat propi nagin referendum, lura va la revisiun da la lescha da taglia en vigur il cumenzament dal 2020.
Las posiziuns
Las deputadas ed ils deputads han cumpareglià las differentas propostas ch'eran sin maisa cun differents menus. I giaja per la dumonda quant bler ch'i dettia per l'avantpast, quant bler per la tratga principala e quant bler per il dessert. E qua èn las opiniuns idas dapart.
Ils burgais levan tranter auter:
- sbassar la taglia sin il gudogn da firmas dad oz 5,5% sin 4,5%
- sbassar la taglia sin dividendas ed autras participaziuns da 60% sin 50%
- auzar l'import liber da taglia per persunas privatas da 15'000 francs sin 15'500 francs
Ils socialdemocrats han proponì:
- laschar la taglia da gudogn sco oz sin 5,5%
- laschar la taglia sin dividendas ed autras participaziuns sco oz sin 60%
- auzar l'import liber da taglia per persunas privatas da 15'000 francs sin 16'000 francs
RR actualitad 12:00