Cun reveder la lescha da taglia dal Grischun ha la regenza grischuna gist schlià plirs problems enina: En discussiun èn stads quatter puncts – be in da quels è dentant stà dispitaivel.
Taglia speziala sin chapital ord cassa da pensiun
Tgi che retira per exempel la cassa da pensiun sco summa pli gronda – enstagl en furma d'ina renta – sto pajar pli pauca taglia sin quest chapital. Suenter ina debatta intensiva han deputadas e deputads decis da reducir il pe da taglia maximal da 4 sin 2%.
Igl è la proposta burgaisa che ha la finala fatg la cursa: Il Grischun stoppia pudair tegnair pitg cun auters chantuns – era per che possessurs da segundas abitaziuns pondereschian cun la pensiun da midar lur domizil da taglia en il Grischun. Ils appels da la sanestra che mo persunas ritgas profiteschian èn stads adumbatten.
Caos da votar
Per in zic divertiment ha procurà la dumonda co votar davart las quatter propostas ch'eran sin maisa tar quest tema. Deputadas e deputads han be trais nufs sin lur pults per votar electronicamain.
La vicepresidenta Aita Zanetti ha laschà votar en duas etappas: L'emprim davart trais propostas ed en ina segunda votaziun davart la proposta da la regenza ed abstenziuns da la vusch. Be: La finala han deputadas e deputads votà dubel – uschia ch'i n'era betg cler sch'il resultat saja insumma valaivel. Suenter ina curta pausa hai dà ina schliaziun fitg pragmatica: Deputadas e deputads han votà enten star en pe e quai per mintga singula proposta ina suenter l'autra.
Ulteriuras midadas senza discussiun
L’onn 2016 ha il parlament federal revedì la lescha davart la taglia a la funtauna – questas midadas valan a partir dal 2021. Perquai ha era il chantun Grischun stuì adattar sias prescripziuns.
Cun reveder la lescha da taglia ademplescha la regenza grischuna in’incumbensa da la fracziun da la PPS: La decleraziun da taglia na ston ins betg pli suttascriver a maun sch’ins inoltrescha quella en furma digitala. Natiralmain sto il speditur pudair vegnir identifitgà, perquai sto il chantun anc introducir in sistem d’autorisaziun. Tut quai duai esser pront il pli baud l’onn 2023.
La progressiun fraida vegn gulivada era sch'il livel da 3% na vegn betg cuntanschì. Quai fiss quest onn – era en connex cun la pandemia da Covid-19 – tuttavia pussaivel.
Senza questa midada sa reducissan per exempel las deducziuns per uffants ubain las deducziuns per las premias da las cassas da malsauns – la progressiun tar la taglia sin entradas s'augmentass dentant. Gist en la situaziun intescherta cun il coronavirus na saja quai betg in effect giavischà e perquai in'impurtanta midada, uschia la regenza grischuna.