Siglir tar il cuntegn
Inhalt

Chantun Lia: Flury al timun ed anc nagin d'inturn per surpigliar

En trais onns dovra la Lia Rumantscha in nov president u ina nova presidenta. Propostas da candidats èn obligadas da far las trais uniuns regiunalas. Anc uss paran quellas dentant betg d'avair en mira candidats u candidatas pussaivlas.

Johannes Flury avant las delegadas ed ils delegai
Legenda: En trais onns datti ina midada al timun – lura fa Johannes Flury plaz ad insatgi auter. RTR, Selina Chistell

Curt suenter la reelecziun da Johannes Flury sco president da la Lia Rumantscha ha anc nagin vulì discurrer da sia successiun. Dentant ha ditg er Flury sez che da chattar candidatas u candidats pussaivels saja il pensum da las uniuns affiliadas.

Las trais uniuns regiunalas èn dumandadas

Proponer candidatas u candidats dastgan sulettamain las trais uniuns regiunalas da la Lia: Quai èn l'Uniun dals Grischs, la Surselva Rumantscha e l'Uniun Rumantscha dal Grischun Central.

Ils presidents e suprastants da quellas uniuns èn conscients che da chattar ina persuna ch'ha la capacitad e l'abilitad da surprender il presidi da la Lia saja ina gronda sfida.

Tuttas trais uniuns discurran dad ina gronda sfida

Tenor Vitus Gartmann da la Surselva Rumantscha saja da discurrer ils proxims mais cun candidats pussaivels. Ma i vegnia segiramain grev. Da quai avis è er Marc Decurtins ch'è en la suprastanza da l'Uniun Rumantscha dal Grischun Central. El di ch'i saja gia tut auter che simpel d'occupar ils posts en l'atgna uniun – uschia che da chattar in candidat per il presidi saja ina fitg gronda sfida.

Er il president da l'Uniun dals Grischs Hermann Thom è pertschert da la sfida – el è dentant er optimistic ch'ins chattia en Rumantschia ina persuna adattada. Perquai dovria quai dentant in engaschament da tut las uniuns.

Candidats pussaivels n'ha er el betg vulì e savì numnar.

RR actualitad 07:00