Siglir tar il cuntegn

Header

video
Brev averta pretenda dapli dunnas en la direcziun e la suprastanza da la Lia Rumantscha
Or da Telesguard dals 26.11.2020.
laschar ir
cuntegn

Lia Rumantscha Brev averta pretenda dunnas al timun

Avant bunamain in'emna ha la Lia Rumantscha preschentà ses nov secretari general, Diego Deplazes – puspè in um, sco gia durant tut ils ultims 100 onns. Las dunnas rumantschas, che sustegnan ina brev averta, avessan gugent dapli dunnas a la testa da la Lia.

Pli che 60% da las persunas engaschadas tar la Lia Rumantscha èn dunnas. En la direcziun ed en suprastanza è il maletg dentant in auter. Là èn 70% da las persunas umens. Ed er il nov secretari general è puspè in um.

Per Viola Cadruvi è quai stà il motiv da rimnar vuschs en ina brev averta cun la pretensiun: il proxim post, pia quel sco president u presidenta, sto vegnir occupà dad ina dunna. Passa 70 dunnas han gia suttascrit quella brev.

Jau na dubitesch betg las cumpetenzas dal nov secretari general. Ma suenter 100 onns fissi stà nairas uras d'eleger ina dunna.
Autur: Viola CadruviAutura e inizianta da la brev averta

Johannes Flury chapescha pretensiun, ma betg il frust

Il president da la Lia Rumantscha ch'ha er cunelegì il nov secretari general chapescha la pretensiun ch'i dovria dapli dunnas en las etaschas da schef. Il frust chapescha el main bain, cunquai che la Lia haja actualmain en la direcziun duas dunnas e trais umens. Cun il cumenzament da Diego Deplazes dettia lura ina maioritad masculina. Pli pauc bain vesia quai or en la suprastanza, en quella sesan quatter umens ed ina dunna.

La direcziun da la Lia Rumantscha

Sin lur pagina d'internet scriva la LR che la direcziun sa cumpona da 5 persunas:

  • Gianna Olina Cadonau (manadra Cutura)
  • Carmen Dedual (manadra Regiuns)
  • Andreas Gabriel (manader Affars publics)
  • Conradin Klaiss (manader Furmaziun)
  • Daniel Telli (manader Lingua)

Plinavant vegn vitiers il secretari general, da nov è quai

  • Diego Deplazes

Gender nagin criteri per eleger il nov secretari general

Il gender n'haja giugà nagina rolla en il proceder d'elecziun – uschè pauc sco criteris regiunals, idiomatics ubain da confessiun, declera Johannes Flury. Els hajan elegì la persuna cun las meglras cumpetenzas e quai saja en quest cas stà in um. Criteris decisivs per l'elecziun sajan stads per exempel l'experientscha en general, l'experientscha da manar, la rait da contacts ubain er co ch'ina persuna po represchentar la Lia. Per quel process hajan els gì sustegn dad in biro professiunal. Uschia haja la suprastanza elegì tenor qualitads, e qua haja in um fatg la cursa. Ina dunna saja dentant vegnida vinavant fin a l'ultima decisiun, sincerescha Flury.

Dunnas cumpetentas èn vegnidas dumandadas, ma quellas han ditg Na.
Autur: Johannes FluryPresident Lia Rumantscha
Sch'ins ha en ina suprastanza blers umens, lura chattan ins era pli paucas dunnas che vulan far quest job.
Autur: Viola CadruviAutura ed inizianta da la brev

Dunna sco presidenta?

Cun la brev vul Viola Cadruvi far curaschi a las dunnas da s'annunziar per in post da manar. L'auter onn elegia la Lia Rumantscha in nov president u ina nova presidenta. Là en tant Viola Cadruvi sco era Johannes Flury da l'avis ch'i fiss temp per ina dunna en questa post.

RTR «Telesguard» 17:40 / actualitad 07:00

Artitgels legids il pli savens

Scrollar a sanestra Scrollar a dretga