Siglir tar il cuntegn

Header

video
Il nov secretari general da la Lia Rumantsch è Diego Deplazes
Or da Telesguard dals 19.11.2020.
laschar ir. Durada: 3 minutas 47 Secundas.
cuntegn

Lia Rumantscha Diego Deplazes è il nov secretari general

La suprastanza da la Lia Rumantscha LR ha elegì Diego Deplazes sco nov secretari general da la LR. Diego Deplazes, oriund da Sumvitg e sesent a Rabius, entra en uffizi il pli tard il zercladur 2021. El succeda a Martin Gabriel.

Diego Deplazes haja l'experientscha necessaria per manar in’operativa ed enconuscha bain la situaziun linguistica, sociala e politica en il Grischun ed en Svizra. Sco la Lia Rumantscha scriva en ina communicaziun, saja la suprastanza sa cunvegnida cun Deplazes da cuntinuar la lavur da la Lia Rumantscha cun la strategia gia instradada.

audio
Intervista cun Diego Deplazes – sia motivaziun e sias finamiras sco secretari general
ord Actualitad dals 19.11.2020.
laschar ir. Durada: 5 minutas 36 Secundas.
La motivaziun primara è ch'il rumantsch stat a mai a cor e sco secretari general da la Lia Rumantscha hai jau il sentiment ch'ins haja in instrument, nua ch'ins po er effectuar insatge.
Autur: Diego Deplazas nov secretari general da la LR

Persuna cun vastas experientschas

audio
Johannes Flury – Pertge che la LR ha elegì Diego Deplazes
ord Actualitad dals 19.11.2020.
laschar ir. Durada: 2 minutas 19 Secundas.

Diego Deplazes ha manà ils ultims onns il center da sanadad Puntreis a Mustér. L'um da 47 onns viva cun sia famiglia a Rabius. Oriundamain ha Diego Deplazes frequentà il seminari da scolastas e scolasts a Cuira ed il seminari da pedagogia curativa a Turitg. Suenter avair instruì intgins onns sin differents stgalims ha Deplazes manà plirs onns la Curatella professiunala Surselva.

Dapi l’onn 2018 è Diego Deplazes deputà da la PCD per il circul Mustér en il Cussegl grond e commember da la Gruppa rumantscha dal Cussegl grond. Politicamain è Deplazes enfin uss surtut s'engaschà per temas da furmaziun e sanadad.

Successur da Martin Gabriel

Diego Deplazes succeda a Martin Gabriel ch'ha il zercladur da quest onn dà giu l'uffizi da secretari general tar la Lia Rumantscha. Il pli tard il zercladur dal 2021 surpiglia lura il nov secretari general la direcziun operativa da la Lia Rumantscha. Fin là vegn la gestiun manada sco gia ils ultims mais da la direcziun da la LR.

Actualmain ha la LR 22 collavuraturas e collavuraturs en var 15 plazzas cumplainas en la sedia principala a Cuira ed en ils biros regiunals a Clugin, Glion, Savognin e Scuol.

Tge pensais vus da quella decisiun? Tge duai il nov secretari da la LR pigliar per mauns? Scrivai voss'opiniun en ils commentaris qua sut.

RTR novitads 11:00

Artitgels legids il pli savens