L'istorgia ha gia cumenzà avant in temp. Il mars ha il center da democrazia dad Aarau crititgà la transparenza manglusa da subvenziuns e las structuras pauc democraticas da la Lia Rumantscha (LR). Dapi la stad passada lavura la LR vid ina nova strategia. La finamira è da daventar pli democratic. Il rapport ha la LR lascha far.
Da stad ha la LR ramassà propostas ed ideas latiers. Dapi lura lavura ella vid in sboz per ina nova strategia. Quel sboz vegnia er contemplà d'ina pitschna gruppa. En quella sesan commembers da las uniuns affiliadas sco er ina persuna da la Pro Svizra Rumantscha (PSR).
Il schaner u favrer avess quel sboz da vegnir tractà in'emprima giada en la suprastanza da la LR, uschia il president da la LR. Avant ch'i vegn decidì davart la nova strategia, sto la radunanza da delegads anc approvar quella.
«Schanza manchentada»
Che la LR prenda serius la critica beneventa era la Pro Svizra Rumantscha (PSR). A l'uniun disturba dentant il process fin là. Quel process saja mo «mez-avert», di Flurin Bundi da la PSR.
Sch'ella (LR) prenda si quella critica duess ella prender si ella fin a la fin ed avrir e democratisar (il process).
Persunas che n'èn betg en il process n'hajan strusch la pussaivladad da influenzar il sboz. La PSR pretenda perquai in proceder da consultaziun. Mintgin duess avair access al sboz, pudair dar in feedback e far atgnas propostas.
Nus sperain or da quai ina debatta davart la direcziun che la Lia Rumantscha duess ir.
Vinavant, uschia il suprastant da la PSR, haja ina strategia ch'è ida tras in process da consultaziun ina pli auta legitimaziun. Cun betg far public il process haja el il sentiment, che la LR sa zuppia.
«Jau na savess betg tge che nus avain da zuppar»
La critica da la PSR na chapescha il president da la LR Johannes Flury betg dal tut. Il proceder actual saja «ordvart democratic». Tut las uniuns affiliadas da la LR sajan integradas. In proceder da consultaziun è per il president da LR nunrealistic.
In proceder da consultaziun public è ina enorma lavur. Là sto jau dir: pli probabel n'avessan nus betg ils meds e las resursas per far quella lavur.
Tenor Johannes Flury haja er mintgin la schanza da commentar e da prender invista en il sboz – cura che quel è pront. El garantescha:
Mintgin ch'è interessà po far valair ses interess.
I constettia dentant che quels commentaris na giajan betg directamain tar la LR. Dentant sajan là las uniuns affiliadas dumandadas. Sur las uniuns po mintgin dar en ses giavischs e sia critica. Las uniun duessan lura purtar tut quai a la LR.
Daco va la Pro Svizra Rumantscha tar las medias?
La PSR fa era part dal process per ina nova strategia. Ch'ella preferiss en quel ina consultaziun publica han els gia pretendì la fin november. Lura han els scrit in e-mail a Martin Gabriel ed a Johannes Flury. En quel scriver pretendan els er che dus commembers da la PSR dastgan far part a la gruppa accumpagnanta.
Dapi lura è Lisa Dermont en la gruppa accumpagnanta. Davart il proceder da consultaziun n'haja la PSR survegnì nagina resposta, ha ditg Flurin Bundi envers RTR. Pir il di suenter ch'els han communitgà lur giavischs sur las medias haja la LR respundì.
Co vai vinavant?
Vid il process da la LR na sa midia nagut. Cura ch'in sboz è pront vegn quel ad ir tar las uniuns accessoricas sco er tar intginas autras. Quellas han la schanza da rimnar feedbacks e da dar vinavant quels a la LR. Sche e cura ch'il sboz vegn mess enturn decida finalmain la radunanza da delegads.
Tut tenor tge che la strategia vegn ad esser, stoppian ins lura adattar las structuras da la LR, di Johannes Flury vers la fin da l'intervista cun RTR.
RTR actualitad 12:00