Siglir tar il cuntegn

Header

cuntegn

Lia Rumantscha Wunderfitz und Redeblitz uss er per emprender rumantsch

L’organisaziun Wunderfitz und Redeblitz lantscha en collavuraziun cun la Lia Rumantscha ina purschida cuntinuanta, numnadamain Wunderfitz und Redeblitz rumantsch, communitgescha la Lia.

Wunderfitz und Redeblitz sustegna la promoziun linguistica tempriva dad uffants a partir da trais onns fin l’entrada en scolina. Quella duaja sustegnair l’integraziun d’uffants cun ina biografia da migraziun u ch’han in’autra lingua d’origin en vischnancas rumantschas u bilinguas. La Lia ha adattà las materialas tudestgas en tut ils tschintg idioms e cumplettà quellas.

purtret da las chistas cun ils cuntegns per emprender la lingua.
Legenda: Wunderfitz und Redeblitz duai gidar uffants cun in autra lingua, d'emprender rumantsch per lura cuntinuar la scola per rumantsch. MAD, Lia Rumantscha

Concept cumprovà

Wunderfitz und Redeblitz sa basa dapi onns sin las chistas d'emprender. Quellas èn sa cumprovadas e cuntegnan chanzuns, versins, gieus ed istorgias davart temas specifics. Ensemen cun persunas d'instrucziun scoladas sin questa purschida, emprendan ils uffants a moda ludica e cun tut ils senns la lingua.

Experientscha cun blers onns

Avrir la box Serrar la box

Sibylle Zwyssig ha lantschà il 2005 Wunderfitz und Redeblitz. Ella è ina persuna spezialisada per la promoziun linguistica tempriva e scolasta primara. L'onn 2015 ha la Fundaziun Pestalozzi undrà il project cun il Premi da promoziun per territoris muntagnards da la Svizra.

Oz vegnan las chistas tematicas utilisadas en nov chantuns da la Svizra tudestga, tranter auter er en 24 vischnancas grischunas.

Per il mument stattan a disposiziun 10 chistas davart temas sco la lindorna, il ballape, il bogn u il circus. Ils proxims mais duain suandar ulteriurs 20 champs tematics. Fin l'onn 2022 duain lura esser a disposiziun 30 champs tematics per ils uffants.

Sustegn chantunal

Ils curs en las vischnancas rumantschas sustegna il chantun Grischun cun ina contribuziun analoga a la contribuziun per la promoziun tempriva per las vischnancas tudestgas. Ils geniturs pajan sulettamain in import tranter 3 e 5 francs per lecziun. Il program cumpiglia total 32 emnas da curs. Quellas cuzzan da settember fin zercladur.

Ils curs che tractan las chistas d'emprender cumenzan il settember 2021. Vischnancas interessadas pon s'annunziar online.

RTR novitads 11:00;

Artitgels legids il pli savens