En il parc industrial Vial a Domat po vegnir construì in nov edifizi. La regenza grischuna ha approvà il sboz d'in contract da cumpra tranter la vischnanca burgaisa da Domat e la LJH Immo SA per metter a disposiziun terren.
L'interpresa vul investir tranter 12 e 15 milliuns francs en il project e domiciliar là 4 firmas. Quellas produceschan products da hightech ed èn orientadas a l'export. A vista mesauna fin lunga vul ins augmentar il dumber da plazzas cumplainas dad 85 sin 140.
In quart da l'areal vendì
L'entir areal cumpeglia radund 200 000 meters quadrat surfatscha. Enfin uss è vendida a la Hamilton, la firma BC-Tech e la LJH Immo SA ina surfatscha da radund 50 000 meters quadrat, pia in quart. Sin 75 000 meters quadrat da l'areal è dentant anc ina opziun da resgia. Quai vul dir: Sche la firma Pfeiffer vuless bajegiar ina resgia pli pitschna sin quai areal pudess ella far quai anc ils proxims onns. Dentant pil mument na saja nagina resgia en mira, informescha Marcus Hassler dal departement per economia publica. Per l'areal tschertga il chantun firmas grondas ch'èn orientadas a l'export, creeschan ina gronda valur e porschan plazzas da lavur. Las trais firmas ch'èn enfin uss sin l'areal dumbran radund 1500 plazzas da lavur.
