Vatgas-mamma sajan pli gnervusas sin las alps, quai possia d'avair far cun il luf, ma era cun auters disturbis. A questa conclusiun vegn la gruppa da lavur da la Confederaziun. Tranter auter han era il post da cussegliaziun per impedir accidents d'agricultura, represchentants da las vatgas-mamma Svizra e da las sendas da viandar Svizra fatg part a l'analisa. La finamira saja la convivenza da tuts – pia purs, turists ed animals selvadis.
Dacurt avevan varga 40 purs da vatgas-mamma da la Surselva scrit ina brev a la presidenta da la Confederaziun, Simonetta Sommaruga e declerà che lur animals ageschian per part panic pervia dal luf.
Tenor il schurnal regiunal grischun da Radio SRF haja in'analisa mussà ch'il luf possia daventar in problem, dentant era auters facturs contribueschian agl agir gnervus, sco dronas, parasguladas e viandants cun chauns. La summa da tut quels facturs possia schizunt daventar in grond problem, cunzunt per ils purs che stettian botta per lur animals.
Tge mesiras concretas ch’ins haja planisà n'ha la gruppa da lavur anc betg tradì. Igl emprim stoppia la finanziaziun vegnir segirada.
