Siglir tar il cuntegn

Header

Navigaziun

270 buccarias rimnadas a Trin Mulin l'onn 2008.
Legenda: 270 buccarias rimnadas a Trin Mulin l'onn 2008. Keystone
cuntegn

Lur impurtanta funcziun Buccarias: Problem e ventira enina

Ils ins sa legran da las buccarias, cunquai ch'ellas inditgeschan l'arrivada da la primavaira. Ils auters odieschan ellas, cunquai che sur tut ils coss mangian davent ragischs e chaschunan gronds donns. Destruir ils coss e las buccarias n'è dentant nagina soluziun.

La gronda part da lur vita passentan las buccarias sut la tiara en furma da coss. Trais enfin quatter onns maglian ils coss fomentads ragischs, avant ch’els daventan baus. Sco baus vivan els mo quatter enfin sis emnas. Per ils purs èn ils coss che mangian ragischs in grond problem, pervi dad els crescha pauc u nagin pastg, il pavel per ils animals. La cumulaziun da stad sitga e blers coss è in immens problems per ils purs.

Soluziun natirala

L’institut Agroscope ha sviluppà en ils onns 80 in bulieu per cumbatter ils coss. Quest bulieu vegn mess sin sem, il pur metta il sem en il terren, il bulieu infectescha il coss e questa infecziun vegn dada vinavant sco la grippa. La fin finala survivan circa 20 pertschient dals coss.

Coss e buccarias han ina funcziun impurtanta

Sragischar dal tuttafatg ils baus che sa mussan il pli savens il matg n’è betg ina buna idea. La fin finala mangian intgins animals gugent coss e buccarias, per exempel talpas, portgs selvadis, erizuns, fiergnas e sur tut utschels-mezmieur. Las buccarias sgolan plaun, èn grondas ed emplainan spert ils maguns dals animals.

Ozendi pli e pli paucas buccarias

Era senza il bulieu datti pli e pli paucas buccarias. Coss dovran numnadamain prads intacts. Sche la terra vegn chavada enturn, moran ils coss. I tanscha sche vatgas van sur il prà, lura vegnan ils coss smatgads ora. Perquai datti coss e buccarias sur tut en las Prealps en spundas taissas. Buccarias èn in indizi per ina natira intacta.

Legenda: Guardar il video Stagiun da buccarias / baus da matg. Durada 04:19 minutas.
Or da Minisguard dals 11.05.2019.

RR actualitad 11:00