Siglir tar il cuntegn
cuntegn

Chantun Luzi Bürkli banduna il Bündner Tagblatt

Legenda: Guardar il video Il schefredactur dal Bündner Tagblatt va. Durada 02:03 minutas.
Or da Telesguard dals 29.01.2019.

Luzi Bürkli, il schefredactur dal «Bündner Tagblatt», banduna la gasetta e vegn nov manader da communicaziun da Grischun Vacanzas. Sco quai che la chasa editura Somedia communitgescha, va Bürkli la fin da matg. El è stà dapi il november 2015 schefredactur dal «Bündner Tagblatt», avant era il schurnalist manader dal post da medias tar il chantun Grischun.

Onns turbulents tar la gasetta

Per Luzi Bürkli na saja la decisiun betg stada simpla da bandunar la gasetta. La lavur ed er il team dal Bündner Tagblatt stettian fitg a cor ad el, perquai haja el er ponderà bain sia decisiun. Ils trais ultims onns èn dentant er stads turbulents.

I ha dà differentas midadas, tranter auter è il Bündner Tagblatt vegnì fusiunà cun la sora gronda Südostschweiz. Sulet las emprimas trais paginas differenzieschan anc il «Bündner Tagblatt» da la «Südostschweiz». Uschia ch'il schurnalist da 45 onns n'è dapi il matg gnanc pli stà schefredactur d'ina entira gasetta. Quai na saja schon betg pli il medem sco avant, dentant betg il motiv principal per la midada.

Na, decisiv na schess jau betg. Decisiv è stà che la nova incumbensa è quasi vegnida offrida a mai.
Autur: Luzi Bürklischefredactur Bündner Tagblatt

Per il «Bündner Tagblatt» munta la demissiun da Luzi Bürkli ch'i dat in nov schefredactur u ina nova schefredactura. Quel tschertgian ins uss, di Silvio Lebrument il manader da la Somedia medias. Uschiglio na dettia quai naginas midadas, ins sa tegnia vinavant vi dal concept actual cun las trais atgnas paginas. Tgi che pudess daventar il successur u la successura da Luzi Bürkli n'è dentant anc betg cler. Silvio Lebrument è dentant persvas ch'il job è attractiv.

Il Bündner Tagblatt dad oz porscha dapli ch'il Bündner Tagblatt da pli baud.
Autur: Silvio Lebrumentmanader Somedia medias

Pled en chapitel ha tar la dumonda dal nov schefredactur dal reminent er Magdalena Martullo Blocher. Ella posseda numnadamain la maioritad da la «Bündner Tagblatt Verlags SA». E tenor Silvio Lebrument èsi fixà en il contract, ch'ins sa discurria cun la possessura tar da quellas dumondas.

RR novitads 14:00