Siglir tar il cuntegn

Header

cuntegn

Chantun Magistraglia GR: Discriminaziun da pajas tar mussadras

Las mussadras da scoletta gudognan memia pauc, di l'uniun da la magistraglia grischuna e taxescha quai sco discriminaziun. L'uniun ponderescha da purtar plant avant Dretgira administrativa. Quel vul l'uniun purtar ensemen cun singulas mussadras da scoletta encunter trais fin tschintg vischnancas.

I na giaja betg cunter las singulas vischnancas, mabain cunter il sistem da pajas dal chantun. E la via dal plant giajan els be perquai ch'i na cuntanschian nagut sur la via politica, di Jöri Schwärzel da l'uniun da la magistraglia grischuna.

La pli bassa paja da l'entira Svizra

Ina mussadra da scoletta gudogna en il Grischun pli pauc che CHF 5'000.00 il mais - la pli bassa paja da l'entira Svizra. Quai è tenor l'uniun da la magistraglia memia pauc. Discriminant è tenor la magistraglia che las mussadras da scoletta gudognan cun ina scolaziun da bachelor pli pauc che auters emploiads dal chantun senza bachelor.

Activar la politica

«Decida la dretgira ch'i sa tracta d'ina discriminaziun, lura sto il parlament chantunal sa mover ed adattar las pajas da las mussadras da scolatta», uschia Jöri Schwärzel. Quai saja la finamira dal plant. Sch'els portan lura propi plant cunter las vischnancas, decida la magistraglia grischuna a la radunanza annuala dals 28 da settember.

audio
Mezdi: Scolina LEGR - plant cunter discriminaziun da pajas
ord Actualitad dals 23.09.2016.
laschar ir. Durada: 1 minuta 49 Secundas.

Il schef dal departement d'educaziun Martin Jäger n'ha betg vulì prender posiziun en chaussa. Sin dumanda dad RTR ha el ditg ch'el s'exprimia pir, sch'i dettia ina decisiun da la dretgira.

RR actualitad 12:00

Artitgels legids il pli savens