Siglir tar il cuntegn

Header

audio
Bunura: Sfidas e schanzas per firmas en Grischun
Or da Actualitad dals 10.01.2020.
laschar ir. Durada: 02:48 minutas.
cuntegn

Manader KMU-Grischun «Il Grischun è in bun chantun per fundar firmas»

En il Grischun èn vegnidas fundadas l'onn passà 959 firmas novas. Quai èn var 7% dapli che l'onn avant. In sguard sin la statistica tradescha vinavant: Var 55% da las fatschentas novas datti er anc suenter 5 onns, en la media svizra. En Svizra Orientala è quai perfin bunamain 5% sur la media.

Nico Tschanz, il manader dal center per interpresas pitschnas u mesaunas (KMU) da la Scola auta spezialisada dal Grischun a Cuira, sa legra da questa cifra da record.

Jau crai schon ch'il Grischun è in chantun da fundaturs da fatschenta.
Autur: Nico TschanzManader dal center da KMUs

Tenor l'econom porschia il chantun surtut blera savida. Il center ch'el maina, sco per exempel er l'Institut per firmas giuvnas (IFJ), porschian cussegliaziun per mintgin e mintgina che vulan fundar in'atgna fatschenta. Els possian per exempel er furnir contacts ad investurs.

Sfidas: demografia e sustegn finanzial

Surtut en las regiuns pli perifericas n'è l'infrastructura betg adina la meglra. Quai vala tant per vias sco er per exempel per colliaziuns d'internet. Vinavant vivan là er pli pauca glieud. Logicamain na saja perquai betg mintga affar adattà per il chantun. En Grischun hajan surtut affars che pon lavurar autonom bunas schanzas.

KMU – interpresa pitschna u mesauna

Textbox aufklappenTextbox zuklappen

Ina interpresa vala fin tar 250 collavuraturs sco interpresa pitschna u mesauna, pia sco KMU. Da las sur 15'000 fatschentas en Grischun èn bunamain tuttas KMU. Mo enturn 25 affars han dapli che 250 collavuraturs.

Tenor l'Uffizi chantunal d'economia èn bunamain la mesadad da tut las fatschentas firmas singulas.

En il Grischun datti vinavant intginas pussaivladads da survegnir sustegn finanzial. L'Uffizi chantunal d'economia porscha per exempel sut tschertas cundiziuns sustegn finanzial u er ina reducziun da la taglia. Ina sort fond che mintga firma nova survegn. In «sustegn da partenza», sco i dettia per exempel en la regiun Turitg, na datti dentant betg. Per Nico Tschanz fiss quai dentant ina purschida che blers beneventassan.

RTR actualitad 07:00

Artitgels legids il pli savens

Scrollar a sanestra Scrollar a dretga