Las deputadas ed ils deputads dal Cussegl grond han nizzegià lur pausa da café per discurrer cun il persunal da tgira ch'è sa rimnà sin la plazza dal teater, gist sper il bajetg dal Cussegl grond a Cuira.
Tenor Monika Schnoz, la manadra da la Spitex Grischun n'hajan els sapientivamain betg formulà pretensiuns concretas vers la politica. I saja propi in'acziun da sensibilisaziun. Anc uss na dettia tenor ella betg in grond problem da persunal en il Grischun. En la Bassa saja la situaziun dentant autra. Pervi da la situaziun demografica – nus tuts vegnin pli vegls e duvrain lura insacura tgira – saja dentant da quintar ch'il problem vegnia er en il Grischun baud u tard pli grond. Perquai saja impurtant che er la politica saja conscienta da quai, per ch'ella possia lura porscher bunas cundiziuns da rom.
Il problem è gia qua
Il manader dal departament da sanadad Peter Peyer è conscient, el manegia ch'il problem da la mancanza da persunal dal fatg, er en la tgira, saja gia uss arrivà en il Grischun. Tenor el èsi impurtant ch'il chantun porscha bunas cundiziuns. Dentant la finala saja quai l'incumbensa da las instituziuns sezzas, da porscher plazzas da lavur attractivas. Tuttina haja il chantun gia prendì mesiras per far squitsch, per exempel prescriva el a las instituziuns da tgira da porscher plazzas d'emprendissadi e quai vegnia er controllà e tut tenor sancziunà cun stritgar contribuziuns.
Sper quai haja la regenza explicit fatg la proposta da crear regiuns da tgira per che las instituziuns possian lavurar ensemen meglier e porscher meglras cundiziuns da lavur.
RR novitads 12:00