Siglir tar il cuntegn

Header

Caduff e Peyer
Legenda: RTR
cuntegn

Marcus Caduff e Peter Peyer Amez la crisa ed amez la critica

En la crisa da corona stattan dus cussegliers guvernativs en il focus en il Grischun: Peter Peyer (PS) e Marcus Caduff (PCD). Els èn confruntads il mument cun blers resuns - per part fitg critics. Ad RTR han els raquintà co els vegnan a frida cun questa critica.

Surtut dapi che la regenza ha decis da far in «lockdown light» per duas emnas en il Grischun, survegnan Peter Peyer e Marcus Caduff dapli posta che usità. Omadus accentueschan ch'i dettia tuttavia era resuns positivs per lur lavur - dentant era resuns senza respect.

audio
Marcus Caduff e Peter Peyer davart critica ed offensiuns
03:37 min, Actualitad dals 11.12.2020.
laschar ir. Durada: 03:37 minutas.

Critica constructiva saja adina bainvegnida, di Peter Peyer. Tals resuns emprovia el era da respunder persunalmain. Dapli fastidis ha il minister da sanadad sch'i vegn derasà teorias enturn Covid-19 che na sa basan betg sin in fundament scientific. Tals resuns stizza el senza leger ubain blochescha ils spediturs - gist era en las raits socialas.

Jau hai chapientscha che tscherta glieud è frustrada ed ha il basegn da svidar il puppen.
Autur: Peter PeyerMinister da sanadad

Era Marcus Caduff enconuscha questa situaziun: El vegnia per exempel fatg responsabel per «sutterrar la gastronomia en il Grischun» ed i vegnia rinfatschà ch'el n'haja nagina idea.

Resuns frechs u primitivs na respund jau betg.
Autur: Marcus CaduffMinister d'economia

El n'haja nagin problem cun critica ed emprovia era da respunder persunalmain sin la posta, sincerescha il minister d'economia. Marcus Caduff pretenda dentant in minimum da respect - uschiglio na pren el betg il temp per respunder ils resuns.

Ils dus novs en il focus

En la politica èn Peter Peyer e Marcus Caduff duas veglias vulps - en la regenza grischuna èn els dentant ils novs (en uffici dapi 2019). Gist els stattan actualmain sco ministers da sanadad e d'economia en il center da la crisa da corona - saja quai enten infumar la populaziun, dar scleriment a las medias ubain era per dar pled e fatg en il Cussegl grond.

Maletg cun Marcus Caduff e Peter Peyer tar lur elecziun 2018.
Legenda: Zercladur 2018: Marcus Caduff e Peter Peyer vegnan elegids sco successurs da Barbara Janom Steiner (PBD) e Martin Jäger (PS) Keystone

RTR actualitad 12:00

Artitgels legids il pli savens

Scrollar a sanestra Scrollar a dretga