Naginas infecziuns novas cun il coronavirus en il Grischun. Il glindesdi ha il chantun dapi passa in onn per l'emprima giada betg gì d'annunziar novas infecziuns da Covid-19. Las acziuns da testar, la politica pragmatica dal chantun ed il fatg che passa la mesadad da la populaziun grischuna è vaccinada ina giada han contribuì a quest fatg.
I na saja però anc betg il mument da metter davent la mascrina, ha ditg la media chantunala, Marina Jamnicki sin dumonda da RTR. Ins possia uss dentant sa legrar da quai ch'il mender da la pandemia saja superà. Da sa tegnair vi da las mesiras da distanza ed igiena, saja però vinavant impurtant, ha accentuà la media chantunala.
En l'entira Svizra tschessa il dumber da novas infecziuns
Per l'entira Svizra ha l'Uffizi federal da sanadad BAG annunzià 367 cas aifer 72 uras. La media da 7 dis è cunquai 47% pli bassa che l'emna avant. Il medem temp ha l'uffizi registrà quatter ulteriurs mortoris en consequenza da corona.